Kinyazê Îbrahîm Mîrzoyêv

Kinyazê Îbrahîm Mîrzoyêv (01.05.1947 – 08.08.2021) – prof., akademîsyen, kurdolog, serokê Yekîtiya Kurdên Qazaxistanê, serokê Federasyona Navneteweyî ya Diasporayên Kurda (FNDK).

1ê Gulana 1947an li Ermenîstanê hatiye dinê.

Rojhilatzan, kurdzan, rexnevanê wêjeyê, doktorê zanistên fîlolojiyê, profesor, akademîsyenê, di Ûnîversîteya Qazaxistanêye Dewletê ya Almatê da serekê navenda zimanên cîhanê û serekê Yekîtiya Kurdên Qazaxistanêye bi navê “Berbang”.

K.Mîrzoyev demeke dirêj di Ûnîvêrsîteya Dewletê ya Ermenîstanê da, li ser para ziman û wêjeya Azerbaycanê rêvebertî kiriye. Di encama şerê azerî û ermeniyan da, di salên 90î da mala xwe bar kiriye Qazaxistanê, di Ûnîversîteya Abay a Dewletê li Almatê serkartiya para Fîlolojiya Rojhilat kiriye û bûye prorektorê (cigîrê rektor) zanîngehê.

Di bin serektiya K. Mîrzoyêv da ji dehan zêdetir kes pîşeyê fîlolog û zanyariyê qezenc kirine. Bûye şêwirmendê gelek monografiyên doktorayê.

Endamê Yekîtiya Nivîskarên YKSS (Yekîtiya Komarên Sovêta Sosyalîst), serekê para Azerbaycan a Yekîtiya Ermenistanê bûye û redaktoriya kovara “Edebî Ermenistan” kiriye. Di heman demê da endamê PEN-a Kurd e û li Almatê serredaktoriya kovara “Nûbar” dike, ku ev kovar bi kurdî û rûsî tê weşandinê.

Di jiyana civakî û siyasî ya kurdên Sovêta berê û Komara Qazaxistanê da roleke çalak leyîstiye. Bûye cîgirê serokê Yekîtiya Giştî Kurdên YKSSyê –1991). Ji 28ê îlona 2003an serektiya “Berbang” – Yekîtiya Kurdên Qazaxistanê meşandiye. Ji sala 2002yan ve cîgirê serekê Yekîtiya Komeleyên Kurd ên Navneteweyî bûye.

Di 22ê cotmeha 1998an da madalya “Hurmetê” ya Komara Qazaxistanê wergirtiye, ji ber xizmeta xwe ya di hêla civakî û perwerdeyê de.

Di sala 2006an da pirtûka wî ya bi navê “Zimanê kurdî” ku du cîld in û ji bo komên 2-5 û 6-9 hatiye amadekirin, ji aliyê Wezareta Perwerde û Zanistê ya Qazaxistanê ve hatibû pesendkirin, weke pirtûka dersê derkete ronahiyê. Wî usa jî sala 2006an “Bername û rêberiya mêtodîkayê ji bo mamosteyê zimanê kurdî” amede kiriye (ji bo dersxanên 2-9-an).

Pirtûkên wî yên girîng:

“Ji dîroka têkiliyên wêje ya Azerbaycan-kurd”. Erîvan, 1975.

“Nivîskarên Azerbaycana Îranê di derheqa kurdan de”. Êrîvan, 1975.

“Wêjeya neteweyî û pevgirêdanên wêjeyê”. Êrîvan, 1985.

“Asoyên wêjeyî”. Êrîvan, 1987.

“Pira dostaniyê”. Bakû, 1989.

“Nîzamî û wêjeya gelên Rojhilat”. Almata, 1995.

“Têkiliyên navbera wêjeyan û pirsgirêkên varisî”. Almaata, 1996.

“Çarenûsa dîroka wêjeya kurd”. Almaata, 1998.

“Kurd. Ansîklopediya biçûk”. Almaata, 2001.

“Kurd”. Almaata, 2003 /bi Îngilîzî/.

“Wêjeya kurdî/Wêjeya gelên Qazaxistanê”. Almaata, 2004.